Faedah beuleun Rajab

Agam Sidroe

Faedah beuleun Rajab
________________________________

Pujoe mula phoen, laju loen peurab,,
Ubak Hadharat, Allah Ta'ala,,
Seulaweut saleum, ngoen peunoeh adab,,
Ubak Muhammad, Rasul mustafa,,

'Oh leuhnya saleum, keu bandum sahbat,,
Hudep lam ta'at, pujoe Rabbana,,
keluarga Nabi, saleum loen intat,,
Keu umat Muhammad, 'alim 'ulama,,

Izin loen ceukoet, masalah Rajab,,
Ngoen peunoeh adab, beuleun mulia,,
Meu soe puasa, bak beuleun Rajab,,
Izin Hadharat, ampunan Dosa,,

Hudep lam donya, hate berkarat,,
Ngoen beuleun Rajab, hate gleh teuma,,
Karena Rajab, beuleun Hadharat,,
Perintah shalat, phoen troen U donya,,

Bak beuleun Rajab, Rasul peu ingat,,
Keu mandum umat, puasa beuna,,
Allah Neu gaseh, hamba yang ta'at,,
Puasa sunat, Allah karunia,,

Lee that faedah, puasa Rajab,,
Ubak Hadharat, do'a tapinta,,
Do'a di hamba, hana le hijab,,
Allah Neu peurab, Neu kaboi do'a,,

Meu'ah loen lakee, ngoen peunoeh adab,,
Bak mandum sahbat, yang ka tem baca,,
Kadanag na salah, haba han dikap,,
Laju hai sahbat, neu teugoer sigra,,

Meu'ah bak hamba, ampoen bak Allah,,
Rakan meutuah, loen pamit teuma,,
Assalamu'alaikum, warahmatullah,,
Rahmat bak Allah, keu gata dumna,,

( Muhammad Asri : 22 mei 2012M / 1 Rajab 1433 H)