skip to main |
skip to sidebar
PIALA EROPA
“PIALA EROPA”
Assalamualaikom, tangloeng bungoeng la
Keu soal bola, bacut lon susoen
Piala Eropa, hajat lon rika
Ulon bri haba, supaya muphoem
Nibak malamnyoe, mulai laga
Nan blah Negara, bandum hai kawoem
Bagi peut boeh grup, peut peut Negara
Jinoe lam grup “A”, yang phoen lon susoen
Keusa Yunani, ngoen polandia
Repoblik ceska, keulhe hai kawoem
Teuma yang keupeut, nanggroe Rusia
Kabeh lam grup “A”, kalhueh lon susoen
Teuma keu Grup “B”, haba lon rika
Denmak Belanda,sinan meuhimpon
Jerman pertugal, kapeut Negara
Nyan grup nuraka, nama hai kawoem
Teuma lam grup “C”, phoen italia
Ngoen Irlandia, dua hai kawoem
Lhuehnyan Spayol,ngoen Kroasia
Peut boeh Negara, sinan meuhimpon
Jinoe lam grup “D” meunyan Ukraina
Ngoen Swedia, prancis hai kawoem
Jitamah inggreh, ka peut Negara
Kabeh saudara, peut grup lon susoen
Nyan euntruek malam, mulai buka
RCTI lanja, nonton hai kawoem
Nanggroe yunani, ngoen polandia
Meuyang phoen laga, nibak malam phoen
Bacut peu ingat, bandum saudara
Bek gara bola, tuwoe ilahon
Tingai seumbahyang, suboeh ngoen insya
Seubab meujaga, nonton malam phoen
Oh uroe teunguet, malam meujaga
Lage meuruwa, tanyoe hai kawoem
Seumbahyang leuhoe, ka deungoen Asa
Mantoeng lam tika, dalam ija kroeng
Tuwoe nafakah, gata jak mita
Teunguet lam tika, gata hai kawoem
Di anuek muda, pih saboeh gura
Tinggai sikula, geujak di gampoeng
Oh wate malam, laloe ngoen bola
Ngoen judi, taroeh meukeupoeng
Taloe yunani, ngoen polandia
Skor 2-1, meutaroeh langsoeng
Lewat Internet, kirem beulanja
Meunan keuh cara, jinoe hai kawoem
Ulon peu ingat, keu bandum gata
Meunan cara, laknat ilahon
Gadoeh meujudi, bak nonton bola
Tapreh troek bala, kirem ilahon
Meumada ohnoe, haba lon rika
Piala Eropa, haba lon susoen
Kalhueh peu ingat, untuk sikada
Ngoen Tuhan Esa, kabeh tugas lon
(Tgk.Diyueb bruek )tgl.08-06-2012
0 komentar:
Posting Komentar