Atjeh lhee sagoe

Agam Sidroe

‎" Atjeh lhee sagoe "

Assalamu'alaikom, Rahmat meukatoe,,
Allah loen pujoe, sidroe yang Esa,,
Seulawet saleum, laju peusampoe,,
pang ulee tanyoe, Rasul mustafa,,

Neu bri ya Allah, hajat beusampoe,,
Diloen neuk hujoe, saboh mustika,,
Haba peu ingat, keu asoe nanggroe,,
Keu diri lon nyoe, leubeh utama,,

Atjeh lhee sagoe, uloen keuneuk proe,,
Teu ireh hate nyoe, loen kaloen nyata,,
Pemuda/pemudi, dum asoe nanggroe,,
Jinoe katuwo, pujoe yang Esa,,

'Oh malam jula, hate loen teumoe,,
Ingat diri droe, ureung seulingka,,
Gadoeh ngoen harta, malam ngoen uroe,,
Dalam buet reugoe, meu cita-cita,,

Islam bak ummat, mandum peugah droe,,
Peugah iman nyoe, keu Dzat yang Esa,,
Yang ta sembah, tan ta tusoe,,
Allah yang sidroe, ta turi nama,,

Cuba neu pike, wahe rakan droe,,
Allah ta pujoe, ta turi hana,,
Rupa neuh tan, nan yang meusoe,,
Kiban taulan droe, ta sembah nama,,

Panyoet lam nanggroe, ka leon sidroe-droe,,
Rata jeut sagoe, hana le 'ulama,,
ureung peu ingat, mandum geutanyoe,,
Yang tem seumeugoe, bak jalan yang beuna,,

Kiban rakan loen, nasib geutanyoe,,
Di pat tameurunoe, ilmee agama,,
Yoh na 'ulama, han ta tem hiroe,,
Han ta tem pakoe, ilmee meuguna,,

Cukoep that seudeh, atjeh lhee sagoe,,
Rakyat lam nanggroe, pungoe keu donya,,
Hate ka sirna, keu Allah sidroe,,
Peuget kaplat droe, maboek keu harta,,

Mantoeng 'ulama, sinoe lam nanggroe,,
Meunoe ka laloe, ateuh rhueng donya,,
Meutan 'ulama, Neu coek sidroe-droe,,
Kiban rakan droe, syi pike teuma,,

Haba loen rika, peu ingat keu droe,,
Keu asoe nanggroe, Atjeh mulia,,
Kadang na salah, kata uloen nyoe,,
Meu'ah rakan droe, kadang na cupa,,

( Agam_sidroe 11 rajab 1433 / 01 juni 2012 )